Täze okuw ýylynyň öňüsyrasynda Mary welaýatynyň 36-njy orta mekdebi özbaşdak energiýa ulgamy bilen üpjün edildi. Bu ulgam birbada iki meseläni çözýär: okuwçylar üçin amatly şertleri döredýär we adaty fizika sapaklaryny amaly barlaglara öwürýär.

ÝUNISEF-iň we Türkmenistanyň Bilim ministrliginiň bilelikde gurnan gün energiýasy stansiýasy diňe bir gün panellerinden ybarat däl, eýsem, doly derejeli ýokary tehnologiýaly toplumdyr. Kuwwaty 12,5 kWt bolan tor fotoelektrik ulgamy 48 kWt·sag kuwwatly litiý akkumulýatory we gibrid inwertor bilen bilelikde işleýär. Şeýle çözgüt mekdebiň çäginiň, sport meýdançasynyň yşyklandyryşynyň we mikroklimaty sazlaýjy inwertor ulgamlarynyň üznüksiz işlemegini üpjün edýär.

Taslamanyň esasy aýratynlygy onuň bilim beriji mümkinçilikleridir. Stansiýa energiýanyň öndürilişi, akkumulýatorlaryň ýagdaýy we energiýanyň sarp edilişi baradaky maglumatlary hakyky wagtda görkezýän sanly gözegçilik ulgamy bilen enjamlaşdyryldy. Türkmenistanyň Döwlet energetika institutyna ýakyn ýerleşýändigi sebäpli, 36-njy mekdebiň binýady welaýatdaky okuwçylar we talyplar üçin gaýtadan dikeldilýän energiýa boýunça amaly barlaghana öwrüler. Okuwçylar hakyky görkezijileriň esasynda ýarymgeçirijileriň fizikasy, energiýanyň saklanma ýörelgeleri we ekologik modeller barada öwrenip bilerler.

«Ýaşyl mekdep» maksatnamasy Türkmenistanyň 2030-njy ýyla çenli gaýtadan dikeldilýän energiýany ösdürmek boýunça Milli strategiýasynyň amaly taýdan durmuşa geçirilişini aýdyň görkezýär. Bu strategiýa laýyklykda, Türkmenistan parnik gazlarynyň zyňyndylarynyň derejesini yzygiderli peseltmäge gönükdirilen işleri alyp barýar. Bu mekdebiň mysalynda çagalar arassa energiýanyň häzirki zaman tehnologiýalarynyň gündelik durmuşy has howpsuz we amatly edýändigine göz ýetirýärler. Şeýle taslamalar täze geljekki inženerler we alymlar neslini ruhlandyrýar.

https://orient.tm/tk/posts/103961